|
|||||||
|
|
|
|||||
|
|
|||||||
قطار السلام
حليمة محمد عبد
الرحمن
halimaabdel_rahman@hotmail.com
دقشك قتر اويل
سكة ساب المسافة تويل
أنت بالشباك شباك أنا بسلم
أنا بقول شيباك أنت ما بسلم
وإيراد النص السابق حسب لغة خرطومية وسطية
دقشك قطر أويل
السكة صعبة المسافة طويل
أنت بالشباك أنا بالسلم
أنا بقول شباك أنت ما بتسلم
فلنسلم كل بطريقته أو لغته الخاصة، طالما توحد الهدف والمقصد.
ونقول لصاحب أو صاحبة الأغنية الجنوبية أنتَ أو انتِ قول شباك ونحن بشباكك بسلم.
العتاب السابق عتاب لطيف حبيب إلي النفس.. استمعت إلي امرأة جنوبية توصي النساء بان
(يكلموا جنا ورجال بتاعهم بانو هرب دا كلام فادي.. أنهن عايزين نكون في آلم أول،
ليه نهن علي تول ورا) أعجبتني الوصية، وتمنيت لو سمعتها نسوة كثيرات. وتمنيت
والأماني تظل أحاسيس جميلة طيلة ما كانت خارج التسعيرة الحكومية، لو كانت هناك
تربية وطنية شمالية وجنوبية(شمالية مقصود بها كل أقاليم السودان الشمالية، بما فيها
دار فور وكردفان..) والأخيرة مفهومة. بدلاً عن الحرب لابد أن نزرع سلام ونحصد سلام
ونقتات سلام..
ومن بين ألاماني المستحيلات، شئ صغيرة خاصتي.. أشرككم معي فيه.. تمنيت لو كانت جدتي
فاطنة الكتيرة بنت أبو الحسن علي قيد الحياة لتحكي عن عودة قرنق وأصحابه الكرام إلي
الخرطوم. تمتلك المرحومة كتيرة بت حساً فكاهياً عالياً. رغم جهلها التام بأنها
معدودة بين تلك الفئة الصغيرة التي لها مقدرة علي إضحاك الآخرين.. وان سر قوتها في
تلك اللهجة البسيطة الجادة والتقطيبة والعبوس الذين لا يفارقان وجهها كأنما هما جزء
من المشهد.. والمشهد المقصود هنا هو عمل توليفتها الخاصة وإعادة حكاية القصة
بطريقتها الفكهة.. لندخل إلي عالم السلام عبر الكتيرة بت أبو الحسن ..
المشهد الأول: سيناريوهات خارجية لتوضيح شخصية كتيرة المعنية:
التاريخ 1983م وقد بدا توزيع الطلبة الذين تم قبولهم بالجامعات والمعاهد
العليا..كانت النتيجة- ولا ادري إن كانت مازالت- تبث عبرا لراديو أم لا؟..بعد إذاعة
النتيجة جاءتني جدتي الكتيرة تبشرني بقبولي بالجامعة..
الكتيرة- ها بت ود الشيخ(تقصدني) الليلة الرادي دا ما خلالو طالباً ما قالوا..
أنا- أها قال شنو يا حبوبة..
الكتيرة - سمع اضاني دي البياكلها الدود..وان بقيتن مكضباني، يختوني في أب ضلاماً
يكسر الإبرة(تقصد القبر، بس بكسر الإبرة دي كيف ما بعرف، أفيدوني) أول شئ سمع اضاني
ذاعوا الناس وقال كدي يا المذيع ربط بدلتو واتحكر في الكرسي وقعد يقرأ: فلان
الفلاني الجامعة الفلانية بلاش(تقصد من دون رسوم دراسية) وفلان الفلاني يمرقو منو
الشيئ الفلاني(تقصد فرضت عليه رسوم دراسية) وفلانة الفلانية مقبولة في الداهية
الفلانية(تقصد الكلية الفلانية). وهذه لم توفق في معرفتها.. عيلا يا بتي إتَن بتقرن
مع الجنوي ولا شنو.
أنا- ايوة يا حبوبة ..
الكتيرة( باستنكار شديد) أخا فيكن
ضحكت ملء شدوقي..بالنسبة للكتيرة، فان مكان الاختلاط الوحيد هو الحفلة. أما عند
الدراسة كل زول يلزم حده. عندها أن الدراسة لابد أن تكون غير المختلطة.
وأصرت الكثيرة علي انه (يعلم الله في جامعة ذاعت الجنوي براهم صر و البنوت براهن
صر.. اها دي ما سمحة مالك ما دخلتيها. ولا اظنك ماك نجيضة.)
المشهد الثاني: عودة إلي سيناريو قطر السلام رواية كتيرة أبو الحسن.
جلست فاطنة الكتيرة، في كشاشتها وقد وضعت عدة قهوتها وقد تحلق حولها نفر لا باس به
من الشباب والصبية، وبدأت في اجترار وإعادة سيناريو حدث عودة قرنق إلي الخرطوم بعد
اثنين وعشرين عاماً.
الكتيرة: يعلم الله يا أولادي الليلة الطيارة دي نقلت ناس الجنوب ديل ما فضلت فيهم
زول.. جو كلهم.. الله بسالني جوبا دي ما فضل فيها زول.
العز ما سمح يا أولادي.. شوف عيني ساعت الطيارة سيت وقفت وفتحوا بابها نزل الديش
بالأول. داك يا السلاح.. قادر هو.. وبس نزل قرنق يقدل في البرش الأحمر الطويل داك
ويسلم هنا ويطايب هناك..ومعاهو واحدة حتها تطايب في الناس التانيين متله.. دي منو؟
وبس ماشي ويسلم ويسلم لامن ايدو ووجعتو وانملخت..وتاني بوووووووووو شالوهو بالعربية
وبس شوفتو للبشير وشوفة البشير ليهو كل واحد قبل علي التاني وكف غارو(أي قبضه بقوة)
وعمتو عليهو( ضمه) وطايبه جنس مطايبة يعلم الله التقول بدورو يقطعو نفس التاني
وسالمو ..حق الله بق الله..كيفن حالك وكيفنهن وليداتك..عيلا قالك قرنق ما سعل
البشير من وليداته..وطلعوا الاثنين. كل واحد فوق طربيزة..بقوا فوق وكل واحد نضم مع
أخوه ونضم مع التانيين القاعدين يتصنطوا في حديثن.
عيلا المحيرني يا وليداتي اكُتَ بدور أشوف الرقيص ما شفتو..
الحضور بدهشة: رقيص شنو يا حبوبة؟
الكتيرة: رقيص النسوان.. ولا واحدة ما رقصت لا شمالية ولا جنوبية.. هن الناس ديل
مالـُن حادين ولا شنو؟ ان بقوا ماهُن حادين الرقيص دا والزغاريد دي ماها للفال
السمح..
ها أولادي التتفاولو تتناولو...!
ملحوظة خاصة: قد نحتجب وقد لا نحتجب حسب ظروف الخرطوم.. علي كل أتمني لكم إجازة
سعيدة للمقيمين والمغادرين..وقنبوا طولا..