|
|||||||
|
|
|
|||||
|
|
|||||||
كتير مره زاد الالم وزاد كتير مر الوجع
وبرضو زاد معاهم هاجسو خوفو والهلع
لما الحبيب عنو راحل في البعيد انجدع
تارك الحب جواهو في العميق انزرع
تارك قلبو اليتيم الفي هواهو انصرع
منو غيرو بطفي اللهب الجواهو اندلع
ويرجع لي نفسو النفس الانكتم ماطلع
أهون من بعادو لو الموت هلاك اجترع
يا مسبب ليهو السهر ولي عيونو الوجع
بي نور جمالك جهر وفي الكون سطع
بي دلالك ظهر مره بان ومرات امتنع
حبو ليك عجيب فاض احساس واندفع
في عيونو شوف تلقاهو شوق ندي اندمع
قلبو من شافك ما شفتو كيف ليك هرع
يامفارق ماكان الفارق حاجز بينكم منع
احتار في الزمان كتير فراق وما جمع
واحتار في الحسن فيك بي النداوه اجتمع
وكيف العقل بارَي القلب وفيك ما انخدع
سلم نفسو وكلو ليك لما بيك خلاص اقتنع
رخيتلو القيد ما بَعَد وان شديتو ليك رجع
يا فارج الهموم الليهو الكل طايع ركع
ثبات القلوب في الصدور بين وهن الضلع
ترجع ليهو عقلو المن عروشو طار انقلع
أو تلم شملهم بعدما فراق مر الرحيل وقع
شعر: حيدر الشيخ
