|
|||||||
|
|
|
|||||
|
|
|||||||
لامصدق لاقنع لكن البال وده مره وجاب
شنو المن ميعادو منع خلاهو اتأخر وغاب
امكن بطلو ريدك وسواهو وسداهو منك باب
امكن ليهو نفض رَوح مشى خلاك وساب
لكن العهد بيهو حقيقي مواجه ومو كضاب
كان الصدق تشوفو في عينيهو في الاهداب
والزيو لازم تلقى ليهو الف عذر واسباب
امكن قربك شافك غمام وليهو داني سحاب
وفي بعدك شافك بعيد كيف الاحقو سراب
امكن قنع دار اطربقها فوق الروسين خراب
وامكن حريص شديد لكن غلط فيهو حساب
بتحصل لي الماعندو هم وأي طلب عندو مجاب
خلي الشايل همومو وبطنو عليها طواها جراب
وكلما يطلع نهار صاليهو بي حرو سوط العذاب
ولا لخبطو ريدك ضَيع واكتوبر عندو اصبح آب
امكن حبك حساهو ذنب رجع خاف منو وتاب
كيف ده احصل من الكان دوام الاقي بالترحاب
آه متحير وكيف في الحيره وضبابها القى جواب
بس راجيهو والرجا الفيهو لامره انقطع لاخاب
ما المحبة البينهم في كل الظروف اتفتحت اعناب
عشان
كده الزمان مهما قسى تلقاهم دوام احباب
