|
|||||||
|
|
|
|||||
|
|
|||||||
ان قلت بحبك .. ما وفيت
وهتفت باسمك ناديت
وشارع شارع لفيت
بعالي الصوت ناغمتك
وغالي احساسي اهديت
جواي وشلتك .. وفي قلبي
شتلتك .. وبي دمي رويت
حقك برضو ما وفيت ..
ان عنك غبت وجيت
ساكن جواي منك
وين امشي ..
ساكن في بصري
وفي رمشي ..
ساكن في جهري
وجاهر في همسي ..
وهبتك روحي ونفسي ..
والطالع نازل نفسي ..
مقامك ما كفيت ..
غافر لك مهما في سويت
ولو كل العندي اديت
برضو قدرك ما وفيت
أحسك جواي ماليني
وين ما تأمر وديني
وين اهرب منك
ان شلتك وان ختيت
وفؤادي ليك مديت
وعمري في حبك افنيت
وين ساقتني خطاي
ما اترددت معاك مشيت
ما انت لي العين الضي
وانت الحس المالي البيت
والسهم البيهو علي رميت
شايفك قدامو وعطشانك
ماشي وقايدو سلطانك
واقدامو حفيانلك ادميت
هارب منك القاك قدامي
هارب منك وانت مسامي
هارب منك وانت انسامي
هارب منك وعنك .. وليك
في الاخر جيت ..
ماشي في صحرا وشايفك
واحه
تعبان وفيك لاقيها الراحه
وعاد الفرح الفيهو اتمدد
ساحه
لي الكل من شافك سريت
قربو حار .. منو التوبه
وبعدو النار الهابه هبوبه
ايه الذنب الفيك جنيت
ارحم بالله شويه وهدي
لي وين الدرب الليك يودي
احبك وحاذر .. في المزح
الهاذر وجدي ..
ان مره في نص السكة بديت
البركان الحامي وسامي
ولي عليك بشويش شديت
ومهما في سويت .. مهما ليك اديت
ألاقي حقك ليهو ما وفيت
شعر: حيدر الشيخ
