|
|||||||
|
|
|
|||||
|
|
|||||||
ان كان الحب احساس ومشاعر
تلقاني جواك الولد الحاضر
القاك جواي الزمن النادر
فرحك فيهو اشارك
وبلهفة اجيك مبارك
حزني فيهو تواسي
واحسك معاي تقاسي
وبيك انجبر الخاطر
تايه في الزمن..
ألقاك مراسي
والحب البينا امتد اواصر
خلانا نقول ياساتر
استرنا من خلقو الساتر
ما انت هواي .. وانت دفاي
في الليل الشاتي وزافر
وانت غطاي في الجو
العاكر وماطر
وانت الفرح في الهم
اليومي وعاصر
وانت البشارة في الحظ
المكشر..
عاثر
فرحي بشوفو اتمده فيك دواير
زي ما حزنك عجيب وغريب
وعميق أبحر فيَ مسافر
ما انت الخاطر .. وفيَ خواطر
وفيهو هواك بخاطر
ما انت دهب جواي خزاين
وانت جزاير وانت بشاير
وانا الرمش الليك وبيك مساهر
ما انت حراير
وانا العارف قدرك وليك بغامر
ما الريد الفينا قبال نتعارف زاهر
والوجه القبلك شاحب
اصبح وجهاً ناضر
ما ريدنا براءة طفلة تلاعب
فيها ليها مساير
عن الناس اغنيت ياكل الناس
وغير الناس والطبع مغاير
قول لي السائل وسؤالو مشاتر
"مين الرابح فيهم ومين الخاسر"
ما كان الريد حسبة تاجر شاطر
ايانا حقول ممتده سهول
وفيها راكضة خيول
فينا الماضي جاري جداول
وفينا الجاي نشوفو سنابل
واصبح مشرق بينا الحاضر
اهلا بيك في مقيم اهلا بيك
الريم الساكن في ونافر
اهلا بيك النور الساكن في
مدهش وباهر
شعر: حيدر الشيخ
